நிஜ அண்ணன், தம்பிகள் சினிமாவிலும் சகோதரர்களாக நடித்திருக்கும் ‘திருப்பதிசாமி குடும்பம்’..!

நிஜ அண்ணன், தம்பிகள் சினிமாவிலும் சகோதரர்களாக நடித்திருக்கும் ‘திருப்பதிசாமி குடும்பம்’..!

ஜே.ஜே.குட் பிலிம்ஸ் பாபுராஜா, ஜெம்ஸ் பிலிம்ஸ் முருகானந்தம் இருவரும் இணைந்து தயாரித்துள்ள படம் ‘திருப்பதிசாமி குடும்பம்.’

இந்த படத்தில் ஜே.கே., ஜெயகாந்த் என்கிற இரண்டு கதாநாயகர்கள் அறிமுகமாகிறார்கள். கதாநாயகியாக ஐஸ்வர்ய லஷ்மி நடிக்கிறார்.   முக்கிய வேடத்தில் ஜெயன் நடிக்கிறார். மற்றும் தேவதர்ஷினி, மயில்சாமி, முத்துராமன், கே.அமீர், கவிராஜ், சிசர் மனோகர் ஆகியோரும் நடிக்கிறார்கள்.

ஒளிப்பதிவு – Y.M.முரளி, இசை   –  சாம்  டி.ராஜ், படத் தொகுப்பு   –  ராஜா முகமது, நடனம் – தினேஷ், ஹபீப், சண்டை பயிற்சி – பயர் கார்த்திக், இணை தயாரிப்பு  –  திருப்பூர்  K.L.K.மோகன், தயாரிப்பு  –      பாபுராஜா, B.ஜாஃபர் அஷ்ரப், இயக்கம்   –  சுரேஷ் சண்முகம். இவர் ‘அரசு’, ‘கம்பீரம்’ உட்பட பல படங்களை இயக்கியவர்.

படம் பற்றி தயாரிப்பாளர் பாபுராஜா பேசும்போது, “சூப்பர் குட் பிலிம்ஸில் 25 வருடம் தயாரிப்பு நிர்வாகியாகவும், ‘கபாலி’ படத்தில் தயாரிப்பு நிர்வாகியாகவும் பணிபுரிந்த அனுபவம் எனக்குண்டு. நான் ஏற்கெனவே ‘அரசு’, ‘சத்ரபதி’ என்று இரண்டு படங்களை தயாரித்திருக்கிறேன்.

இப்போதுதான் எனது மகன்களை கதாநாயகர்களாக இந்தப் படத்தில் நடிக்க வைத்து படத்திற்கு ‘U’ சர்டிபிகேட்டையும் வாங்கி சென்சார் குழுவினரால் பாராட்டையும் வாங்கிவிட்டேன்.

இந்த படமும் வித்தியாசமான கதைக் களம் கொண்டது.  நீண்ட நாட்களுக்கு பிறகு தியேட்டருக்கு வந்து பார்க்கக் கூடிய குடும்பப் படமாகவும், ஜனரஞ்சகமான படமாகவும் இது இருக்கும்.

நாம் நமது வீட்டுக்கு பக்கத்தில், எதிரில் பார்க்கிற ஒரு சராசரி அப்பாதான் திருப்பதிசாமி. பக்கத்து வீட்டில், எதிர் வீட்டில் ஒரு பிரச்சனை என்றால் ஓடிப் போய் உதவி செய்யும் குணம். தன்னுடன் வேலை செய்யும் ஒருவனது பிரச்சனைக்கு ஆதரவு தரும் அன்புள்ளம் கொண்ட அமைதியான அவருக்கு மனைவி, மகன்கள், மகள் என நேர்மையாக வாழும் குடும்பம்.

அப்படிப்பட்ட அவர்களுக்கு அதிகார பலம் கொண்ட ஒருவனது அடாவடியால் ஏற்படும் பிரச்சனை. ஆட்பலம், அதிகார பலம்  கொண்ட அவனையும் அவனது அராஜகத்துக்கு துணை போகும் அரசியல்வாதியையும் மூளை பலத்தால் திருப்பதிசாமியின் மகன்களான  இருவரும் எப்படி வெல்கிறார்கள் என்பதுதான் கதை.

திருப்பதிசாமியாக ஜெயன் நடித்திருக்கிறார். அவரது மகன்களாக எனது மகன்கள்  ஜே.கே., ஜெயகாந்த், நடித்திருக்கிறார்கள். என் மகன்கள் என்பதற்காக கதையை மீறி எதையும் திணிக்கவில்லை. கதைக்குண்டான கதாபாத்திரங்களாகத்தான் நடித்துள்ளனர்…” என்றார்.

படம் விரைவில் வெளிவர இருக்கிறது.

 




error: Content is protected !!