விஜய் இயக்கத்தில் உருவாகும் ஜெயலலிதாவின் வாழ்க்கை வரலாற்று படம் ‘தலைவி’ 

விஜய் இயக்கத்தில் உருவாகும் ஜெயலலிதாவின் வாழ்க்கை வரலாற்று படம் ‘தலைவி’ 

இன்று மறைந்த முதல்வர் ஜெ.ஜெயலலிதா அவசர்களின் பிறந்த  நாள். இதை முன்னிட்டு  இயக்குநர் விஜய் இயக்கத்தில் உருவாகும் அவரது வாழ்க்கை வரலாற்று படத்தின் தலைப்பு  ‘தலைவி’ என அதிகாரப்பூர்வமாக அறிவிக்கப்பட்டுள்ளது.

இந்தப் படம்தான் ஜெயலலிதா அவர்களின் அதிகாரப்பூர்வ வாழ்க்கை வரலாற்று படம் எனக் குறிக்கப்படலாம், ஏனெனில், ஜெயலலிதா அவர்களின் அண்ணன் மகன் திரு.தீபக் அவர்களிடம் இருந்து இத்திரைப்படத்திற்கு தடையில்லா சான்று பெற்ற பின்புதான் இந்த ப் படம் உருவாகி வருகிறது. 

இந்தத் திரைப்படம் பற்றி இயக்குநர் விஜய் பேசும்போது, “தலைவி  என்ற தலைப்புக்கு அவரைவிட யார் பொருத்தமாக இருக்க முடியும்? ‘தலைவர்கள் பிறப்பதில்லை; உருவாகிறார்கள்’ என்ற ஒரு புகழ்பெற்ற மேற்கோள் உள்ளது.

j.jayalalitha

ஜெயலலிதா மேடம் அத்தகைய தத்துவத்திற்கும் அப்பாற்பட்டவர். அவர் பிறப்பிலேயே அத்தகைய தலைமைப் பண்புகளை பெற்றவர். அர்ப்பணிப்பு, கடின உழைப்பு, அனுபவம் மற்றும் புத்திசாலித்தனம் ஆகியவை ஒரு தலைவரை உருவாக்கும் குணங்கள் என்றால், அவர் பிறப்பிலேயே அந்த குணங்களை பெற்றவர். இந்த குணாதிசயங்களால்தான் நாம் அனைவரும் அவரை ‘அம்மா’ என்று வணங்குகிறோம்.

இத்தகைய உயர்ந்த தலைவரின் தைரியமே என்னை மிகவும் கவர்ந்தது. அதனால் தான் இந்த படத்தை இயக்க வாய்ப்பு கிடைத்தவுடனேயே எந்த யோசனையும் இல்லாமல் ஒப்புக் கொண்டேன். மிக நேர்மையான ஒரு வரலாற்று படமாக இதை கொடுக்கும் பொறுப்பு எனக்கு இருக்கிறது, அதற்காக கடுமையாக உழைத்து வருகிறேன்.

இந்த ‘தலைவி’ தலைப்பை வெளியிட அவரது பிறந்த நாளை விட மிகச்சரியான தருணம் ஏதும் இல்லை. எங்களுக்கு இந்த படத்தை உருவாக்க தடையில்லா சான்று கொடுத்த ஜெயலலிதா அம்மா அவர்களின் அண்ணன் மகன் தீபக் அவர்களுக்கு நன்றி.

இந்த படத்துக்கான கதை ஐடியாவை கொண்டு வந்ததோடு, இன்றும் எனக்கு ஆதரவாக இருந்து வருகிறார் விப்ரி மீடியா தயாரிப்பாளர் விஷ்ணுவர்தன் இந்தூரி. அர்த்தமுள்ள மற்றும் நேர்மையான வாழ்க்கை வரலாற்று படங்களை கொடுக்கும் அவரது நோக்கம் எனக்கு நிறைய உத்வேகம் கிடைத்துள்ளது.

director vijay

இந்தத் தயாரிப்பு நிறுவனம் இந்த படத்தை ரசிகர்கள் பொக்கிஷமாக நீண்ட காலத்துக்கு வைத்துக் கொள்ள வேண்டும் என்பதில் கவனமாக இருக்கிறார்கள்.

பாகுபலி எழுத்தாளர் திரு விஜயேந்திர பிரசாத் இந்த படத்தில் இணை கதாசிரியராக இணைகிறார்  என அறிவிப்பதில் மகிழ்ச்சி அடைகிறோம். அவரின் பங்களிப்பு இந்த படத்துக்கு கூடுதல் மதிப்பை சேர்க்கும்.

நிரவ் ஷா ஒளிப்பதிவு செய்கிறார். என் படங்களில் மிகச் சிறந்த ஹிட் பாடல்களை கொடுத்த ஜி.வி.பிரகாஷ் குமார் இந்த படத்துக்கு இசையமைக்கிறார். மதன் கார்க்கி பாடல்கள் எழுதுகிறார். நடிகர்கள் மற்றும் தொழில் நுட்ப கலைஞர்கள் பற்றிய விபரம் விரைவில் அறிவிக்கப்படும்…” என்றார்.

அதிகாரப்பூர்வமான படம் என்பதால் ஜெயலலிதாவின் திருட்டுத்தனம், மக்கள் பணத்தைக் கொள்ளையடித்தது, லஞ்சம் பெற்றது.. மனித உரிமைகளைக் காலில் போட்டு மிதித்தது.. மக்களை மதிக்காமல் எதேச்சதிகாரமாக நடந்து கொண்டது, நீதிமன்றங்களில் பல முறை குட்டுப்பட்டது, ஜனநாயகத்திற்கு விரோதமாக நடந்து கொண்டது.. என்று எண்ணற்ற மக்கள் விரோதச் செயல்களைச் செய்த ஜெயலலிதாவின் உண்மை முகத்தை இத்திரைப்படம் கொடுக்கும் என்று எதிர்பார்க்கலாம்..!




error: Content is protected !!