ரஜினியின் புகழ் பெற்ற வசனமான ‘கெட்ட பையன் சார் இவன்’ புதிய படத்தின் தலைப்பாகிறது..!

ரஜினியின் புகழ் பெற்ற வசனமான ‘கெட்ட பையன் சார் இவன்’ புதிய படத்தின் தலைப்பாகிறது..!

பிரபலமான பாடல்களின் பல பல்லவிகள் படத் தலைப்பாகியுள்ளன. பிரபல நாவல்களின் தலைப்புகள் படப் பெயராகியுள்ளன. அதே போல படங்களில் சூப்பர் ஸ்டார் ரஜினி பேசிய வசனங்களும் படத் தலைப்பாகி வருகின்றன.

‘இது எப்படி இருக்கு’, ‘என் வழி தனி வழி’, ‘கதம் கதம்’, ‘போடா ஆண்டவனே நம்ம பக்கம்’ போன்ற தலைப்புகளைத் தொடர்ந்து தற்போது ‘முள்ளும் மலரும்’ படத்தில் சூப்பர் ஸ்டார் பேசிய  ‘கெட்ட பையன் சார் இந்தக் காளி’ என்ற வசனமும் ‘ கெட்ட பையன் சார் இவன் ‘ என்கிற படப் பெயராகியுள்ளது.

‘சதுரங்க வேட்டை’ திரைப்படத்தின் மூலம்  காந்தி பாபுவாக நம் மனதில் இடம் பிடித்த வித்தியாசமான நடிகரான நட்டிதான் இப்படத்தின் நாயகனாக நடிக்கிறார். 

இந்தப் படத்தை தீபக் சுந்தர்ராஜன் என்கிற புதிய இயக்குநர் இயக்கவுள்ளார். ‘பயணங்கள் முடிவதில்லை’ ‘வைதேகி காத்திருந்தாள்’, ‘அம்மன் கோவில் கிழக்காலே’, ‘மெல்லத் திறந்தது கதவு’,  ‘ராஜாதி ராஜா’ போன்ற  வெள்ளி விழா கண்ட பல வெற்றிப் படங்களை இயக்கியவரும்  நடிகருமான ஆர். சுந்தர்ராஜனின்  மகன்தான் இந்தத் தீபக்.

4O9A5004

அப்பா இயக்குநர்  என்பதால்  எல்லாம் தனக்குத் தெரியும் என மகன் அப்படியே திரைப்படம் இயக்க வந்து விடவில்லை. முறையாக இயக்குநர் விஜய்யிடம் ‘தாண்டவம்’,  ‘தலைவா’, ‘சைவம்’ போன்ற படங்களில் உதவி இயக்குநராகப் பணியாற்றி சினிமா பற்றிய பாடங்கள் படித்துவிட்டுத்தான் இப்போது இந்த ‘கெட்ட பையன் சார் இவன்’ திரைப்படத்தின் மூலமாக இயக்குநராகியுள்ளார்.

இதே படத்தில் ஏ.எச்..காஷிஃப் என்பவர் இசையமைப்பாளராக அறிமுகமாகிறார். இவரும் ஒரு வாரிசுக் கலைஞர்தான்.  இசைப் புயல் ஏ.ஆர். ரஹ்மானின்  தங்கை மகன்தான் இந்த காஷிஃப்..

கடந்த காதலர் தினத்தன்று வெளியான ‘போ போ என்’ என்கிற ஒற்றைப் பாடல் மூலம் எட்டுத் திக்குகளையும் எட்டிப் பார்க்க வைத்தவர்தான்  இந்த  காஷிஃப்.

ஒளிப்பதிவு கெளதம் ஜார்ஜ். இவர் பி.சி.ஸ்ரீராமின்  மாணவர். பி.சி.ஸ்ரீராமிடம் ‘ஷமிதாப்’,   ‘ஐ’,  ‘ஓ காதல் கண்மணி’  போன்ற படங்களில் உதவி ஒளிப்பதிவாளராகப்  பணிபுரிந்துள்ளார்.

செந்தில் சிவகுமார் படத் தொகுப்பாளாராகப் பொறுப்பேற்றுள்ளார்.   இவர் புகழ் பெற்ற படத் தொகுப்பாளரான இயக்குநர் பி. லெனினின்  மாணவர். இந்தப் படத்தின் மூலமாகப் படத் தொகுப்பாளராக அறிமுகமாகிறார்.

இத்தனைப் புதுமுகங்களை அறிமுகப்படுத்துகிற ‘6 ஃபேஸ் ஸ்டுடியோஸ் ‘ (6 FACE STUDIOS) தயாரிப்பு நிறுவனத்திற்கும் இதுதான்  முதல் படம். 

திரைத் துறையில் நவீன் பிரபாகரன், சுரேஷ் கண்ணன், விகதேஷ், ஆக்டோஸ்பைடர் எஸ்.துரை என நண்பர்கள் இணைந்து  விநியோகஸ்தர்களாகத்  தங்களது முத்திரையைப் பதித்துள்ள இவர்கள், இப்போது  தயாரிப்பாளர்களாகக்  களமிறங்கியுள்ளனர்.

திறமைசாலிகள் பலரின் வாரிசுகளும் புகழ் பெற்ற கலைஞர்களின் உதவியாளர்களும் ஆர்வமுள்ள இளைஞர்களும்  ஒன்றிணைந்துள்ள இப்படத்தின் மீது இப்போதே நம்பிக்கையும் எதிர்பார்ப்பும்  கூடி வருவதை உணர முடிகிறது.

இந்தப் படத்தின் முதல் போஸ்டரை சமீபத்தில் தயாரிப்பாளர் சங்கத்தின் தலைவரான கலைப்புலி எஸ்.தாணு தனது அலுவலகத்தில் வெளியிட்டார்.

படம் வெற்றி பெற வாழ்த்துகிறோம்..!




error: Content is protected !!