காதல் சண்டையும், கபடி சண்டையும் கலந்ததுதான் ‘அருவா சண்ட’ திரைப்படம்

காதல் சண்டையும், கபடி சண்டையும் கலந்ததுதான் ‘அருவா சண்ட’ திரைப்படம்

ஒயிட் ஸ்கிரீன் புரொடக்ஷன் நிறுவனம் சார்பில் தயாரிப்பாளர் வி.ராஜா பிரம்மாண்டமான செலவில் தயாரித்து வரும் படம் ‘அருவா சண்ட.’

கபடி வீரர் ராஜா நாயகனாக நடிக்க, நாயகியாக மாளவிகா மேனன் நடிக்கிறார். மற்றும் சரண்யா பொன்வண்ணன், ‘ஆடுகளம்’ நரேன், சௌந்தர்ராஜா, ‘காதல்’ சுகுமார், மதுரை சுஜாதா, கஞ்சா கருப்பு, இயக்குநர் மாரிமுத்து, பயில்வான் ரங்கநாதன், விஜய் டிவி சரத், நெல்லை சிவா, வெங்கடேஷ், ரஞ்சன், டெலிபோன் ராஜ், சூரியகாந்த் உட்பட பலர் நடித்திருக்கின்றனர்.

தரண் இசையமைக்க, கவிப் பேரரசு வைரமுத்து பாடல்களை எழுதியிருக்கிறார். ஒலிப்பதிவு – சந்தோஷ் பாண்டி, படத் தொகுப்பு – வி.ஜே.சாபு ஜோசப், கலை – சுரேஷ் கல்லேரி, சண்டை பயிற்சி – தளபதி தினேஷ், நடனம் – சிவசங்கர், தீனா, ராதிகா, தயாரிப்பு நிர்வாகம் – கே.வீரமணி, எழுத்து, இயக்கம் – ஆதிராஜன்.

இப்படத்தின் படப்பிடிப்பு சென்னை புறநகர் பகுதிகள், மதுரை, பொள்ளாச்சி, சேலம், கேரளா பகுதிகளில் நடைபெற்று முடிந்திருக்கிறது. தற்போது படத்தின் டப்பிங் பணிகள் நடைபெற்று வருகின்றன.

இயக்குநர் ஆதிராஜன் படம் பற்றி பேசும்போது, “காதல் சண்டையும், கபடிச் சண்டையும்தான் இந்த ‘அருவா சண்ட’ படத்தின் கதைக் களம்.

வளர்ச்சியடைந்த, நாகரீக சமுதாயத்திலும் நீரு பூத்த நெருப்பாக கனன்று கொண்டிருக்கிறது சாதி வெறி. தென்மாவட்டங்களில் அது கொழுந்து விட்டு எரிகிறது. தர்மபுரி கலவரங்கள், வட மாவட்டங்களிலும் சாதியின் வன்மத்தை பதிவு செய்கின்றன.

இப்படிப்பட்ட கௌரவக் கொலைகளின் நியாய, அநியாயங்களை பொறி பறக்கும் வார்த்தைகளால் அலசும் விதமாக இத்திரைப்படம் உருவாக்கப்பட்டிருக்கிறது. இப்படத்தின் திரைக்கதை. கிளைமாக்ஸ் காட்சி மனசாட்சி உள்ள அத்தனை பேரையும் உலுக்கி எடுக்கும்.                                                                                  

அதே போல வீரத் தமிழனின் தேசிய அடையாளம் கபடி. பட்டித் தொட்டியில் மட்டுமல்ல, நகரங்களிலும் இளைஞர்களின் விருப்பமான வீர விளையாட்டாக இருந்து வருகிறது. ஐ.பி.எல் கிரிகெட்டை போல, இன்று நாடு முழுவதும் பிரபலமாகி வரும் ‘புரோ கபடி’  (PRO-KABADI) தேசிய அளவில் கபடி வீரர்களால் பணத்தையும், புகழையும், அங்கீகாரத்தையும் பெற முடியும் என்பதை உறுதிப்படுத்தி வருகிறது.

அந்த வகையில் கபடி வீரர்களின் லட்சியங்களுக்கு உற்சாகமூட்டும் வகையிலும் ‘அருவா சண்ட’ படம் அமைந்திருக்கிறது.

சரண்யா பொன்வண்ணன் இதுவரை ஏற்றிராத வேடத்தில் உருக்கமாக நடித்திருக்கிறார். காட்சியமைப்பும், வசனங்களும் உயிர்ப்புடன், உணர்ச்சிப்பூர்வமாக இருக்கின்றன என்று சரண்யா பொன்வண்ணன் படப்பிடிப்பின்போது பாராட்டினார்.

முக்கிய வேடங்களில் ஆடுகளம் நரேன், சௌந்தர்ராஜா, காதல் சுகுமார், மதுரை சுஜாதா ஆகியோர் நடிப்பில் மிரட்டி இருகிறார்கள். பக்கா கமர்ஷியல் படமாக இருவாகி வருகிறது ‘அருவா சண்ட…” என்றார்.