“தேசிய கல்விக் கொள்கை கிராமப்புற மாணவர்களுக்கு முற்றிலும் எதிரானது”-நடிகர் சூர்யா கடும் கண்டனம்..!

“தேசிய கல்விக் கொள்கை கிராமப்புற மாணவர்களுக்கு முற்றிலும் எதிரானது”-நடிகர் சூர்யா கடும் கண்டனம்..!

“தேசிய கல்விக் கொள்கை வரைவு என்பது கிராமப்புற மாணவர்களுக்கு மூடப்பட்ட இரும்பு கதவுகள்…” என்று வன்மையாகக் கண்டித்துள்ளார் நடிகர் சூர்யா.

தேசிய கல்விக் கொள்கை வரைவு அறிக்கை பற்றி அகரம் பவுண்டேஷன் இன்று காலை பிரசாத் லேப் தியேட்டரில் ஒரு கருத்தரங்கினை நடத்தியது.

இந்தக் கூட்டத்தில் அகரம் பவுண்டேஷனின் நிறுவனரான நடிகர் சூர்யா பேசும்போது, “மத்திய அரசு வெளியிட்டுள்ள தேசிய கல்விக் கொள்கை இன்னமும் முழுமையாக மக்களிடம் சென்று சேரவில்லை, இன்னும் இது பற்றிய விழிப்புணர்வு ஏற்படாத காரணத்தினால் புதிய கல்விக் கொள்கை குறித்து நாம் விரிவாக, விவாதிக்க வேண்டியது மிகவும் அவசியம்.

மத்திய அரசு வெளியிட்டுள்ள இந்தப் புதியக் கல்விக் கொள்கை பற்றிய வரைவில், 3ஆம் வகுப்பு முதல் நுழைவு தேர்வு, கல்வி தேர்வு என தேர்வுகள் வைக்கப்படுவதாக அறிவித்துள்ளனர். சரியான, சமமான கல்வி இல்லாமல் எப்படி கல்வி தேர்வுகள் வைக்க முடியும்..?

இந்தப் புதிய கல்விக் கொள்கை என்பது முப்பது கோடி மாணவர்களின் வாழ்க்கை பற்றியது. இந்த கல்விக் கொள்கை பற்றிய கருத்துக்கள் மக்களிடம் இருந்து கிடைக்கப் பெற்றால் மட்டுமே மாற்ற முடியும் என்கின்றபோது பெற்றோர்களும், ஆசிரியர்களும் இது குறித்து அதிக கவனம் செலுத்த வேண்டும்.

தற்போது ஓராசிரியர் உள்ள பள்ளிகள் மூடப்பட்டு வருகிறது, அவ்வாறு இருக்கையில் எப்படி அங்கு படிக்கும் பிள்ளைகள் இது போன்ற கொள்கைகளுக்கு ஏற்ப எப்படி தேர்வுகளை எழுத முடியும்..?

ஆரம்பக் கல்வியிலேயே மூன்று மொழிகளை திணிக்கின்றனர். இது போன்று மொழிகளை திணிப்பதன் மூலம் அரசு பள்ளி மாணவர்கள் மிகவும் பாதிக்கப்படுவார்கள். ஏனெனில் அரசு பள்ளிகளில் இது போன்ற கல்விகள் மாணவர்களுக்கு கிடைப்பதில்லை.

5-ம் வகுப்பு  முதல் பொதுத்தேர்வு  நடத்தினால் இடைநிற்றல்  அதிகரிக்கும்.  6.5 கோடி மாணவர்கள் பள்ளிப் படிப்பை  பாதியிலேயே நிறுத்தி விடுவார்கள். 60% மாணவர்கள் அரசு பள்ளிகளில்தான் படிக்கிறார்கள்.

அரசு  பள்ளிகளில் போதுமான ஆசிரியர்கள் இல்லை, 10  ஆண்டுகளாக ஆசிரியர்களே இல்லாமல் படிக்கும் 30% மாணவர்கள் எப்படி நீட் தேர்வு  எழுதுவார்கள்..?

பள்ளிகள் மட்டுமல்லாது கலை அறிவியல் கல்லூரியில் சேர்வதற்கும் நுழைவுத் தேர்வு வைத்துள்ளனர். எதற்கெடுத்தாலும் நுழைவுத் தேர்வு நடத்தினால் மாணவர்கள் எப்படி படிக்க முடியும்..? ஒரு வேலை படிக்க முடியாமல் அவர்கள் தேர்வுகளில் தோல்வியடைந்தால் பின் எப்படி அனைத்து மாணவர்களும் படிக்க முடியும்…?

நுழைவுத் தேர்வுகளால் தனியார் பயிற்சி  மையங்கள் அதிகரிக்கும், தனியார் பயிற்சிப் பள்ளிகள் நாடு முழுவதும் 5000 கோடி ரூபாயை வருமானமாக ஈட்டுகின்றன. கற்பித்தல் என்ற முறைக்கு பதில் கோச்சிங் சென்டர் முறைவரும். அது போன்ற ஒரு சூழ்நிலை ஏற்பட்டால் பின் பள்ளி கல்லூரிகளின் தேவைகள் இல்லாமல் போய்விடும்…” என்றார் சூர்யா.




error: Content is protected !!