அம்புலி இயக்குநர்களின் அடுத்தத் திகில் படைப்பு “ஆ”

அம்புலி இயக்குநர்களின் அடுத்தத் திகில் படைப்பு “ஆ”

உலகத் தரத்துக்கு இணையாக தொழில் நுட்பத்தில் முன்னேறி வரும் தமிழ் சினிமாவில், ஆவியுலகை பற்றிய படங்களுக்கு இப்போதும் வரவேற்பு இருப்பது ஆச்சரியம்தான்..!

‘அம்புலி 3-D’ படம் மூலம் தமிழ்த் திரைப்படவுலகின் கவனத்தை  ஈர்த்த தயாரிப்பாளர்கள் கே.ஆர்.டி. creative frames நிறுவனமும், ‘அம்புலி’ படத்தின் இயக்குனர்கள் ஹரி-ஹரேஷ் இரட்டையரும் மீண்டும் இணைந்து வழங்கும் படம்தான் இந்த ‘ஆ’.

“ஆ’  என்ற சத்தம்  அலறலாக வெளிப்படும்போது பயத்தையும், பயங்கரத்தையும், வலியையும் உணர்த்தும். இந்த வார்த்தையைவிட பலமாக பயம் என்ற உணர்வை வெளிப்படுத்தும் வார்த்தை தமிழ் மொழியில் கிடையேவே கிடையாது. அதனால்தான் இதனையே படத்தின் தலைப்பாக வைத்திருக்கிறோம்…” என்கின்றனர் இயக்குனர்கள் ஹரி மற்றும் ஹரேஷ்.

ஆவியுலகை பற்றி ஆராய மூன்று இளைஞர்கள்  உலகமெங்கும் சுற்றி வரும்போது, அவர்களுக்கு ஏற்படும் பயங்கரமான அனுபவம்தான் இந்த ‘ஆ’ . ஐந்து வித்தியாசமான தளங்களில் நடக்கும் திகில் கதை இது.

ஜப்பான், துபாய், ஆந்திராவில் உள்ள ஒரு ஆள் அரவமற்ற நெடுஞ்சாலை, வங்க கடல் நடுவே, மற்றும் தமிழகத்தின் தென்கோடியில் உள்ள ஒரு கிராமத்தில் உள்ள ATM  ஆகிய இடங்களில் நடைபெறும் சம்பவங்களின் தொகுப்புதான்  இந்த ‘ஆ’ திரைப்படம்.

திறமையான கலைஞர்கள் என பெயர் எடுத்த ‘அம்புலி’ கணேஷ், சிம்ஹா, மேஹ்னா, பாலா, எம் எஸ் பாஸ்கர், பாஸ்கி மற்றும் பலர் இதில் நடித்திருக்கிறார்கள். 

சஸ்பென்ஸ், திரில்லர் டைப் படங்கள் தமிழகத்தில் தொடர்ந்து வெற்றி பெறும் சூழலில் அந்த வெற்றியில் பங்கெடுத்துக் கொள்ள இந்த ‘ஆ’ படமும் அடுத்த மாதம் ரிலீஸாகவுள்ளது.